जातीय तेढ निर्माण करणारे व्हिडिओ व्हायरल करणाऱ्या ट्विटर हँडलर वर फौजदारी गुन्हा दाखल;लातूर पोलीसाच्या सोशल मीडिया मॉनिटरिंग सेलची कारवाई

जातीय तेढ निर्माण करणारे व्हिडिओ व्हायरल करणाऱ्या ट्विटर हँडलर वर फौजदारी गुन्हा दाखल;लातूर पोलीसाच्या सोशल मीडिया मॉनिटरिंग सेलची कारवाई

लातूर: सोशल मीडियावर जातीय तेढ निर्माण करणाऱ्या पोस्ट वाढत आहेत. सध्या सुरू असलेल्या विविध वादाचे अनुषंगाने पोलीस अधीक्षक निखिल पिंगळे यांचे निर्देशान्वये व मार्गदर्शनात लातूर पोलिसांनी त्यांचे सोशल मॉनिटरिंग सेल अधिक कार्यान्वित केले आहे.

सोशल मीडिया मॉनिटरिंग करीत असताना लातूर पोलीस ट्विटर हँडल वर एका ट्विटर युजरने कुठलातरी, आक्षेपार्ह व दोन समाजात तेढ निर्माण होईल असा व्हिडिओ लातूर पोलिसांना टॅग करून सेंड केल्याचे सोशल मीडिया मॉनिटरिंगच्या पोलिसांच्या निदर्शनास आले. त्यावरून सदर व्हिडिओमधील घटनेबाबत माहिती घेतली असता सदरची घटना लातूर जिल्ह्यामध्ये घडली नसल्याचे निष्पन्न झाले. सदर ट्विटर युजरने सामाजिक शांतता भंग करून धार्मिक तेढ निर्माण करण्याच्या उद्देशाने सदरची व्हिडिओ सोशल मीडियावर वायरल केल्याचे प्रथमदर्शनी दिसून आले. त्यावरून सोशल मीडिया मॉनिटर सेल मधील पोलीस अमलदार रियाज सौदागर यांचे फिर्याद वरून संबंधित ट्विटर युजरच्या विरुद्ध पोलीस ठाणे शिवाजीनगर येथे दिनांक 25/04/2022 रोजी गुन्हा क्रमांक 202/2022 कलम 505(2) नुसार आक्षेपार्ह पोस्ट व्हिडिओ व्हायरल करणाऱ्या ट्विटर यूजरच्या विरोधात गुन्हा दाखल करण्यात आला असून गुन्ह्याचा पुढील तपास पोलीस ठाणे शिवाजीनगर चे सहाय्यक पोलीस निरीक्षक कुदळे हे करीत आहेत.

लातूर पोलिसाकडून नागरिकांना आवाहन

कोणीही सोशल मीडियावर धार्मिक तेढ निर्माण करणारे संदेश पसरू नयेत. व्हाट्सअप, फेसबुक, ट्विटर, इंस्टाग्राम अथवा इतर सोशल मीडिया ग्रुपवर सामाजिक, धार्मिक, जातीय तेढ निर्माण करणारे लिखाण, फोटोज, व्हिडिओज, आक्षेपार्ह मजकूर प्रसारित करू नये. सोशल मीडिया मॉनिटरिंग सेल सर्व प्रकारच्या मीडिया सोर्सवर लक्ष ठेवून आहेत. आक्षेपार्ह पोस्ट करणारे इसमा विरुद्ध यानंतरही फौजदारी गुन्हे दाखल करण्यात येणार आहेत. कोणीही सोशल मीडियातून एखाद्याची बदनामी होईल असे मेसेज टाकू नये. धार्मिक तेढ तसेच जातीय तेढ निर्माण होईल अशी व्यक्तिगत किंवा सोशल मीडिया प्लॅटफॉर्मवर व्हिडिओ टाकू नये. सोशल मीडियावर लातूर पोलिसांच्या सोशल मीडिया मॉनिटरिंगची नजर असून आक्षेपार्ह पोस्ट फेसबुक, व्हाट्सअप, टिकटॉक, इंस्टाग्राम व इतर कोणत्याही माध्यमातून केल्याचे आढळून आल्यास संबंधितावर कडक कारवाई करण्यात येईल असा इशारा लातूर पोलिसांनी दिला आहे.